Fundur Utandeildarinnar vegna komandi sumarsins var haldinn í síðustu viku.  Þar áttu Vatnsberar engan fulltrúa, staðreynd sem á ekki að koma neinum á óvart.  Ég var búinn að tilkynna stjórn deildarinnar að við myndum ekki senda inn lið í ár.

Ég er nú ekki alveg með sögu klúbbsins á hreinu en mér skilst á öllu að við höfum ekki náð 10 starfandi árum, held að þetta hafi farið af stað 2001 eða 2002 sem FC Fist.  Nafninu var svo breytt 2005 í Vatnsbera af þáverandi formanni.

Árangurinn svona upp og ofan í gengum tíðina, bestum árangri náðum við sumarið 2006 þegar við vorum hársbreidd frá því að komast í úrslitakeppnina.  Árið 2007 poppuðum við tímabilið enn frekar með því að skrá okkur í VISA-bikarkeppni KSÍ og gerðum það líka 2008.  Fengum 5 leiki í keppninni þessi tvö ár, framlengingar, vítaspyrnukeppni, kærumál og mikið fjör.

Tvö síðustu tímabil voru hinsvegar í heild sína frekar erfið, mikið af mannskap hafði horfið á braut og fáir komið í staðinn.  Í þessi 5-6 ár sem ég tók þátt í þessu var þetta meira gaman en erfitt en gleðin og stemmingin var farin úr þessu í þarna í lokin.

Takk fyrir mig.

Dabbi #1

Eftir erfitt sumar árið 2008 var samt ákveðið að halda áfram með klúbbinn og senda lið inn í utandeildina þetta sumar sem er að ljúka.  Menn gerðu sér samt fulla grein fyrir því að eitthvað yrði að vinna í leikmannamálum.  Við hófum æfingar á Fylkisvellinum í febrúar og eitthvað af nýjum andlitum létu sjá sig, sumir stoppuðu stutt við á meðan aðrir tóku slaginn með okkur í sumar.  Tókum þátt í æfingamóti þar sem niðurstaðan varð 1 sigur, 1 jafntefli og 2 töp.  Töpuðum svo þeim tveimur æfingaleikjum sem við tókum að auki áður en utandeildin hófst.

Töpuðum fyrsta leiknum í mótinu en unnum þann næsta og komust síðan í gegnum fyrsta leik í bikarkeppninni eftir framlengingu og vítaspyrnukeppni.  Til að gera langa sorgarsögu stutta þá töpuðum við restinni af leikjum sumarsins.

Lokastaðan í riðlinum var:

B-riðill	L	U	J	T	Mörk	Stig
1. Hjörleifur	10	8	2	0	38:15	26
2. Vatnaliljur	10	7	3	0	29:11	24
3. SÁÁ	10	6	3	1	30:13	21
4. Dufþakur	10	5	2	3	31:29	17
5. Haukar U	10	4	4	2	22:13	16
6. Fc CCCP	10	4	1	5	21:20	13
7. Esjan	10	3	1	6	22:28	10
8. Geirfuglar	10	3	0	7	18:26	9
9. Hómer	10	2	2	6	16:30	8
10. Fc Dragon	10	1	4	5	11:22	7
11. Vatnsberar	10	1	0	9	12:43	3

Neðsta sætið í riðlinum var því niðurstaða sumarsins.  Fengum á okkur flest mörk allra liða í deildinni, ef allir þrír riðlarnir eru taldir, og ekki mörg lið sem skoruðu færri mörk en við.  Eitt þeirra, Fc Dragon sem skoruðu 11 mörk, tókst að skora 4 á móti okkur.  Björgvin Sólberg telst markakóngur sumarsins hjá okkur með 4 mörk.  Ætli Halli verði ekki að teljast spjaldakóngur sumarsins með eina rauða spjald sumarsins.

Þótt mannskapsmálin hafi verið skárri í sumar miðað við árið áður þá var það samt ekki nógu gott.  Í tveimur leikjum mættum við bara 11 og það var því alveg á tæpasta vaði sem við náðum því takmarki sumarsins, að mæta alltaf a.m.k. 11.

Fjárhagshliðin á þessu dæmi er að reddast, mér sýnist við vera svona nokkurn veginn á núllinu.  Reyndar voru einhverjar teiprúllur, hitakrem og kælispray sem ég verslaði inn sem var ekki sett upp í heildarpakkann en ég vonast til að það hafist að fá restina af seðlunum í hús.

Þá er spurning hvað menn ætla að gera núna í framhaldi.  Ætli sé ekki réttast að menn taki þetta eins og síðast, taki því rólega fram að áramótum og athuga svo stemminguna hjá kjarnanum.  Ég tel ekki grundvöll fyrir því að halda úti liði næsta sumar nema með einhverri toppmannskapsaukningu og ekki nóg að fá bara einhverja, þeir verða að vera þokkalegir í tuðrusparki.

Ég hef sjálfur séð um þennan klúbb síðastliðin tvö ár eftir að fyrrverandi formaður pakkaði niður, skipti á blokkaríbúðinni sinni í Breiðholtinu og einbýlishúsi með bílskúr í sveitinni.  Kiddi hefur reyndar aðstoðað mig en það er ljóst að ég nenni ekki að vera lengur í skipstjórasætinu, allur sms-pakkinn, leikskýrslur, búningaþvottur og fjárhagsmálin svo eitthvað sé nefnt.

Svona er staðan á þessu.  Þangað til næst...

Dabbi #1

Byrjunarliðið í kvöld:


Bekkurinn:  Kiddi, Ingvar, Hannes og Ari.

Lentum 0:2 undir áður en við komust á blað með marki frá Gauknum.  Litum á löngum köflum í fyrri hálfleiknum út eins og sjoppulegar hafnarmellur í aukahlutverki í lélegri klámmynd og staðan 1:5 í hálfleik, þ.a.m. víti og sjálfsmark frá Kidda.  Menn brettu aðeins upp ermar í síðari hálfleik sem var eins og tölurnar bera með sér mun skárri.

Ekki draumaendirinn á þessu annars frekar erfiða tímabili.  Ætli ég hendi ekki inn uppgjörspistli sumarsins á næstu dögum ef ég verð í stuði.  Annars eru við komnir í eitthvað frí, búnir að segja upp Fylkisvellinum og nú geta menn hugsað sinn gang.  Búið er að ræða við þá sem eiga eftir að gera upp sín fjárhagsmál og það á að klárast á næstu dögum, allar upplýsingar um reikningsnúmer og annað er hérna til vinstri undir liðnum borgunarmenn 2009.

Dabbi #1

Síðasti leikur tímabilsins, mæting ekki síðar en 20:30.  Ég vona að menn sjái sér fært að fjölmenna og klára þetta mót, ekkert annað en að berja sig saman og reyna ljúka þessu með reisn.

Þið þekkið þetta, algjör nauðsyn að láta vita hvort menn séu on eða off.

Skuldarar fá sömuleiðis sent sms varðandi skuldarstöðu sína.

Dabbi #1

Síðasti skipulagði boltinn í bili og síðasti leikurinn á sunnudaginn.

Dabbi #1

Byrjunarliðið í kvöld:

Mæting ekki síðar en hálftíma fyrir leik.  Næstsíðasti leikur sumarsins og því hver að verða síðastur að girða sig í brók.  Margt jákvætt við síðasta leik þótt það hefði ekki skilað neinum stigum í hús, vonandi gengur það upp núna.

Þið þekkið þetta, láta vita on/off með einhverju móti.

ATH:  Ég ætlast til að þeir sem eiga eftir að ganga frá sínum greiðslumálum geri það hið fyrsta með millifærslu eða mæti einfaldlega með seðla í leikinn, það vantar enn tæplega 30 þúsund til að dæmið endi í núlli.

Dabbi #1

Ath breyttur tími.  Þetta er bara í kvöld, boltinn eftir viku verður kl 21:30.  Næsti leikur er á mánudaginn.

Dabbi #1

Byrjunarliðið í kvöld:


Bekkurinn:  Hannes, Gústav, Stefán Gaukur, Þorgeir, Ingvar og Ari.
Davíð S. setti tvö kvikindi í fyrri hálfleik og megnið af fyrri hálfleik vorum við í þokkalegum málum þótt þetta væri nokkuð villt á köflum.  Enduðum fyrri hálfleikinn ekki nógu vel og byrjuðum þann síðari á hælunum og þeir settu 4 mörk á okkur.  Náðum að minnka muninn en komust ekki nær, fokking grátlegt að fá ekkert út úr þessu.

Það þýðir ekkert annað en að halda áfram með planið og reyna að klára þetta eins og menn, tveir leikir eftir.  Bolti á fimmtudag, hann verður mögulega fyrr en áður en eigum eftir að fá það staðfest.  Svo er næsti leikur á mánudag eftir viku.

Dabbi #1

Mæting kl 20:30.  Búið að vera talsvert barsl á mannskapnum síðustu vikur en núna verða menn að spýta í.  Það eru bara 3 leikir eftir og við ætlum að reyna að rífa þetta upp og klára þetta á betri nótum.  Við leggjum því mikið upp úr því að menn komi því í kring að mæta í þessa síðustu leiki.  Vitavonlaust til árangurs að mæta bara 11 og menn að spila einhverjar steyptar stöður.

Sem fyrr, nauðsynlegt að láta vita með einhverjum leiðum um hvort menn ætli að mæta eða ekki.

Nefndin.

Næsti leikur á sunnudaginn.

Dabbi #1

Hið fyrsta takk...

Byrjunarliðið í gær:


Á bekknum var ekki kjaftur.  Annað skiptið í sumar sem við erum bara 11 sem mætum þannig að ennþá erum við að forðast ruglið frá síðasta sumri en það er bara að reddast á lyginni einni saman.  Hjöllinn klárlega best spilandi liðið sem við höfum spilað við í sumar en við gerðum þetta fullauðvelt fyrir þá á köflum.  Við höfum tapað leikjum stærra og litið betur út, þvílíkan skotgrafahernað man ég ekki eftir að hafa tekið þátt í, reyni að pikka út 2-3 hálffæri í huganum sem við fengum í leiknum en það eru mjög sennilega ýkjur.

Þrír leikir eftir og nú verðum við að reyna klára þetta eins og menn.  Ég vona að það fari eitthvað að hægjast á sumarbústaðaferðum hjá mannskapnum sem taldi víst fyrir ekkert alltof marga.

Held við getum afskrifað æfingu í kvöld.

Minni menn á að ganga frá sínum peningamálum eins og fram kom í síðasta pistli.

Dabbi #1

Mæting eigi síðar en 18:30.  Þunnskipaður hópurinn í síðustu tveimur leikjum hjá okkur þannig að ég ítreka við menn að láta vita, hér eða með sms-i um hvort menn mæta eða ekki, fyrr en síðar.

Að auki vil ég biðja menn um að ganga frá sínum málum með greiðslur fyrir sumarið.  Allar upplýsingar hérna til vinstri undir Borgunarmenn 2009.  Þetta er ekki flókið, við erum ekki komnir með í hús fyrir öllum reikningum sumarsins sem by-the-way eru á mínu nafni en það er alveg á kristaltæru að ég ætla ekki að borga fyrir mannskapinn það sem upp á vantar.

Dabbi #1

Ég veit ekkert hvort menn eru farnir á þjóðhátíð eða hvað en við stefnum á þokkalega mætingu.  Næsti leikur á miðvikudag.

Dabbi #1